Futbol olamining mashhur yulduzi, Braziliya va “Santos” klubi tarbiyalanuvchisi Neymar Yevropa futbolida jadal ko‘tarilayotgan yosh yulduz Florian Virs haqida ajablanarli tarzda javob qaytardi. Nemis jurnalistlari bilan bo‘lgan suhbat chog‘ida unga Germaniya chempionatida sensatsiya yaratib, ko‘plab top-klublarning diqqatini o‘ziga jalb qilgan «Bayer» yetakchisi Virs haqida savol berildi.
— Neymar, Germaniyalik yosh yulduz Florian Virs haqida nima deya olasan?
— Rostini aytsam, uni tanimayman, — deya kutilmagan javob qaytardi Neymar.
Jurnalistlar keyinchalik «Bavariya»ning yorqin yulduzi Jamol Musiala haqida ham so‘rashganida, Neymar uni yaxshi bilishini va uning o‘yiniga yuqori baho berishini ta’kidladi:
— Ha, Jamolni yaxshi bilaman. U ajoyib iqtidor sohibi va juda yuqori saviyadagi o‘yinchi. Menimcha, u kelajakda dunyoning eng buyuk futbolchilari qatoriga kiradi.
Ushbu qiziqarli suhbat esa jahon futbolida tez orada ko‘plab muhokamalarni keltirib chiqardi. Boisi, 22 yoshli Florian Virs so‘nggi mavsumda Germaniya chempionatida eng katta sensatsiyani amalga oshirdi. Uning ajoyib o‘yinlari tufayli Leverkuzenning «Bayer» klubi tarixida ilk bor Germaniya chempioniga aylandi. Virs mavsum davomida ko‘plab klublarning transfer nishonlariga aylangan va ayniqsa «Bavariya» bu futbolchiga jiddiy qiziqish bildirgan edi.
Biroq Virs «Bavariya»ning taklifini rad etib, futbol jamoatchiligini hayratda qoldirdi. Ko‘plab ekspertlarning taxminiga ko‘ra, yosh yulduzning Myunxenga ko‘chib o‘tishdan bosh tortgani sababi, aynan «Bavariya» yetakchisi Jamol Musiala bilan raqobat qilishni xohlamagani bilan bog‘liq bo‘lishi mumkin. Chunki bu ikki futbolchi pozitsiya va o‘yin uslubi jihatidan bir-biriga juda o‘xshash va o‘zaro raqobat muqarrar edi.
Florian Virsning «Bavariya»dan voz kechishi futbol muxlislari va ekspertlar orasida ko‘plab munozaralarga sabab bo‘lmoqda. Ayrimlar buni oqilona qaror sifatida baholasa, boshqalar uni raqobatdan qochish sifatida talqin qilmoqda.
Shunday ekan, Germaniya futbolida yorqin iz qoldirayotgan bu ikki yosh yulduz – Virs va Musiala o‘rtasidagi raqobat kelgusida yana qanday tus olishi hozircha noma’lum. Lekin bir narsa aniqki, ularning faoliyati keyingi yillarda futbol muxlislari diqqat markazida bo‘ladi.
