Jahon chempionati saralash bosqichida O‘zbekiston va Birlashgan Arab Amirliklari terma jamoalari o‘rtasidagi o‘yin oldidan o‘zbekistonliklardan BAAga safarni vaqtincha kechiktirish so‘ralmoqda, deb Nova24.uz xabar berdi.
Turizm qo‘mitasiga Tashqi ishlar vazirligi tomonidan taqdim etilgan ma’lumotga ko‘ra, o‘yinga 5000 nafarga yaqin fuqaro borishni rejalashtirmoqda. Biroq mezbonlar reglamentga ko‘ra faqat 960 ta o‘rin (8%) mehmon muxlislarga ajratadi.
O‘yin "Al-Vahda" futbol klubi stadionida o‘tkaziladi, u 12 ming kishiga mo‘ljallangan. Natijada ko‘plab muxlislar stadionga kira olmasligi mumkin va bu jamoat xavfsizligiga tahdid tug‘dirishi mumkin.
Shu sabab, BAA aeroportlarida xavfsizlik xizmatlari cheklov choralarini ko‘ra boshlagan. Bu holatda deportatsiya qilish ehtimoli ham mavjud.
Shu bois, o‘yin davrida BAAga turistik safarlarni tashkil qilish va targ‘ibotini vaqtincha to‘xtatish tavsiya etiladi.
