Ertaga O‘zbekiston milliy terma jamoasi jahon chempionati saralash bosqichida juda muhim va hal qiluvchi o‘yinda maydonga tushadi. Bizning futbolchilarimiz BAA milliy jamoasiga qarshi mehmonda o‘tadigan bahsga tayyorgarlikni davom ettirmoqda. Bu o‘yinda mag‘lubiyatdan tashqari har qanday natija O‘zbekiston uchun JCH-2026 eshiklarini keng ochib beradi.
Mazkur tarixiy va mas’uliyatli uchrashuv arafasida biz sobiq futbolchi va taniqli futbol mutaxassisi Shuhrat Rahmonqulov bilan bog‘lanib, uning fikrlarini so‘radik.
Rahmonqulov arablarning uydagi o‘yinlarda har xil usullarga murojaat qilishi va bu orqali raqibning diqqatini chalg‘itishga harakat qilishini alohida ta’kidladi:
"Arablar g‘alaba uchun barcha imkoniyatlarni ishga soladi. Biz o‘ynagan paytlarimizda, 1999 yili ham BAAda shunday vaziyatlarga duch kelganmiz. O‘shanda ham arablar har xil noqonuniy usullardan foydalangan, hatto kechasi bilan uyqu berishmagan edi. Lekin biz bunga e’tibor bermasdan o‘yinga diqqatimiz va irodamizni saqlagan holda tayyorlanganmiz. Hozirgi futbolchilarimiz ham shunday fitnalarga e’tibor bermasliklari lozim. Chunki arablar shunday ishlar bilan raqibni ruhiy jihatdan sindirmoqchi bo‘ladi."
Shuhrat Rahmonqulovning fikricha, O‘zbekiston terma jamoasi arablardan ancha kuchli va yuqori saviyaga ega. U futbolchilarimizga ishonayotganini alohida qayd etdi va jamoani hozirgi bosqichda qo‘llab-quvvatlash muhimligini aytdi:
"Biz terma jamoamizga qat’iy ishonamiz. Jahon chempionati yo‘lidagi muhim uchrashuvda muvaffaqiyat qozonish uchun hamma narsa futbolchilarimiz qo‘lida. Agar ertaga arablarga qarshi uchrashuvni muvaffaqiyat bilan o‘tkazsak, Qatarga qarshi bahsni katta bayram sifatida nishonlashga imkon yaratiladi. Hozirgi vaziyatda asosiysi — sarosimaga berilmaslik, o‘zimizni bosiq tutgan holda maydonga chiqish va maksimal darajada diqqatni jamlashdir. Ishonaman, ertaga O‘zbekiston milliy terma jamoasi muxlislarga buyuk zafarni taqdim etadi."
Eslatib o‘tamiz, BAA va O‘zbekiston milliy terma jamoalari o‘rtasidagi hal qiluvchi bahs ertaga, 5 iyun kuni Toshkent vaqti bilan soat 21:00da start oladi. Ushbu tarixiy uchrashuvni yurtimizdagi millionlab muxlislar intizorlik bilan kutib qolmoqda. Bugun milliy terma jamoamizning har bir a’zosiga omad tilaymiz va ularning g‘alabasiga ishonamiz!
