Futbol bo‘yicha O‘zbekiston milliy terma jamoasi tarixdagi eng buyuk natijasiga erishib, butun xalqimizni quvonchga to‘ldirdi. Abu-Dabida BAA termasi bilan kechgan hal qiluvchi o‘yinda durang natija qayd etilib, O‘zbekiston terma jamoasi 2026 yil AQSH, Kanada va Meksikada o‘tadigan Jahon chempionati yo‘llanmasini o‘z qo‘liga kiritdi.
Ushbu tarixiy natija munosabati bilan Prezident Shavkat Mirziyoyev terma jamoa bosh murabbiyi Timur Kapadze bilan telefon orqali muloqot qilib, barcha futbolchilar va murabbiylarni samimiy muborakbod etdi hamda ularning g‘alabasini xalqimiz uchun Qurbon hayiti kunlariga ajoyib tuhfa sifatida baholadi.
Shu bilan birga, FIFA prezidenti Janni Infantino ham O‘zbekiston futbolining tarixiy muvaffaqiyati munosabati bilan maxsus tabriknomasini yo‘lladi.
«O‘zbekiston termasi FIFA oilasiga 1994 yilda qo‘shilganidan buyon Olimpiada o‘yinlari va yoshlar o‘rtasidagi bir qator nufuzli xalqaro musobaqalarda munosib o‘yin ko‘rsatib, yuqori natijalarni qayd etib kelmoqda. Sizlar bu safar ham ajoyib saralash bosqichini o‘tkazib, kelasi yil yozidagi Jahon chempionatida ishtirok etish huquqiga ega bo‘ldingiz. Dunyo bo‘ylab millionlab muxlislar endi „Oq bo‘rilar“ning mundialdagi ilk ishtirokini orziqib kutishmoqda», — deyiladi FIFA rahbari tabrigida.
Ta’kidlash kerakki, O‘zbekiston milliy terma jamoasi 30 yillik tarixida sakkizinchi marta Jahon chempionati saralashida qatnashib, ilk marotaba ushbu buyuk maqsadni amalga oshirdi. Timur Kapadze boshchiligidagi jamoa A guruhida 18 ochko jamg‘arib, tarixiy natijaga erishdi.
Eslatib o‘tamiz, jamoamiz BAA bilan safardagi hal qiluvchi bahsda raqib bilan 0:0 hisobidagi durangni qayd etib, o‘z maqsadiga erishdi. Butun mamlakatda ushbu tarixiy natija ko‘tarinki kayfiyat bilan nishonlanmoqda.
Endi O‘zbekiston futbol muxlislari 2026 yili AQSH, Meksika va Kanadada o‘tadigan mundialda o‘z milliy jamoasini katta qiziqish bilan kuzatib, ularning har bir o‘yinida yonida bo‘ladi. Bu esa nafaqat futbolimiz, balki butun O‘zbekiston sporti tarixida yangi sahifaning boshlanishi hisoblanadi.
