Yevropa futbolida transfer oynasi qizg‘in pallaga kirgan bir paytda, Turkiyaning eng nufuzli klublaridan biri – “Galatasaroy” ham katta o‘zgarishlar bilan yangi mavsumga tayyorgarlikni boshladi. Istanbul klubi ichki chempionlikni qo‘lga kiritishi bilan kifoyalanmasdan, Yevropa miqyosida ham jiddiy raqobatchiga aylanishni maqsad qilmoqda.
Mavsum yakunlanishi bilan turklar “Bavariya”ning asosiy hujumchilaridan biri Leroy Saneni o‘z safiga qo‘shib olganini e’lon qildi. Bu transfer Yevropa futboli ommaviy axborot vositalarida katta shov-shuvlarga sabab bo‘ldi. Leroy Sane so‘nggi yillarda “Bavariya” tarkibida muntazam ravishda to‘p surib kelgan va uning Istanbulga yo‘l olishi ko‘pchilik uchun kutilmagan holat bo‘ldi.
Ma’lumotlarga ko‘ra, Sanening “Galatasaroy” bilan shartnomasi uch yil muddatga tuzilgan va u yangi mavsumdan boshlab Turkiya Superligasida o‘z mahoratini namoyon etadi. Bu esa, klubning faqat Turkiya doirasida emas, balki Yevropa arenasida ham katta maqsadlarni ko‘zlayotganidan dalolat beradi.
Istanbulliklar bu bilan cheklanib qolmoqchi emas. Turkiya ommaviy axborot vositalarida tarqalgan xabarlarga ko‘ra, “Galatasaroy” “Bavariya”dan yana to‘rt nafar futbolchini ham o‘z tarkibiga qo‘shib olish istagida. Gap himoyachi Sashe Boe, yarim himoyachi Leon Goretske, markaziy himoyachi Kim Min-Je va qanotdagi tezkor futbolchi Kingsli Koman haqida ketmoqda.
Agar ushbu transferlar amalga oshsa, “Galatasaroy” nafaqat Turkiyada, balki Yevropa miqyosida ham katta kuchga aylanishi mumkin. Leon Goretska – Germaniya terma jamoasining tajribali a’zosi, maydon markazida o‘yin tempini belgilaydigan futbolchi sifatida tanilgan. Koman esa qanotdagi chapdast yugurishlari va tezkor reydlari bilan raqib himoyachilariga bosh og‘rig‘i keltira oladi. Kim Min-Je va Boe esa himoyadagi mustahkamlikni ta’minlaydigan nomzodlar sifatida ko‘rilmoqda.
“Galatasaroy”ning bunday jiddiy transfer siyosati klubning kelgusi mavsumda Chempionlar Ligasida katta natijalar ko‘rsatishni ko‘zlayotganini anglatadi. Ayniqsa, o‘tgan mavsum Yevropa Ligasining 1/16 finalida muvaffaqiyatsiz ishtirokdan so‘ng, jamoa xalqaro maydonda o‘z nufuzini tiklashni qat’iy maqsad qilgan.
Eslatib o‘tamiz, “Galatasaroy” joriy mavsum Turkiya chempionatida boshdan-oxir ustunlikni saqlab qoldi va so‘nggi turda ham asosiy raqobatchi “Fenerbaxche”ni orqada qoldirib, titulni o‘z nomiga rasmiylashtirdi. Turkiya kubogida ham muvaffaqiyat qozonib, milliy ikkilikka erishdi. Endi esa navbat Yevropa sahnasiga chiqish.
Turkiya futbolini sevuvchilar uchun bu transferlar albatta quvonchli yangilik. Bundagi eng qiziq jihat shundaki, “Galatasaroy” nafaqat nomdor futbolchilarni jalb etmoqda, balki ularning yuqori formasi, tajribasi va mentaliteti orqali jamoaning ichki sifati va raqobatbardoshligini yanada oshirmoqda.
Jamoa safidagi katta o‘zgarishlar, yuqori maqsadlar va salohiyatli transferlar “Galatasaroy”ning kelajakda Yevropaning elita klublari bilan tenglashish orzusini amalga oshirish yo‘lidagi muhim qadamlardan biri sifatida baholanmoqda. Ko‘ramiz, Leroy Sane va ehtimoliy yangi keluvchilar bilan “Galatasaroy” qanday natijalar ko‘rsata oladi? Muxlislar esa kutmoqda – katta umid va sabr bilan.
