Oʻzbekistonlik MMA jangchisi Mashrabjon Roʻziboyevning UFC bilan imzolagan shartnomasi bekor qilindi. U 11 fevral kuni tashkilot bilan rasmiy bitim tuzgan va 16 fevral kuni UFC Vegas 102 turnirida debyut qilishini kutayotgan edi. Biroq rejalar oʻzgardi.
Jang nega bekor qilindi?
Mashrabjon Roʻziboyev amerikalik jangchi Jerad Gordonga (20-7, 1) qarshi jang oʻtkazishi kerak edi. Ammo u vazn tashlash normasini bajara olmagani sababli jang bekor qilindi. UFC esa unga ikkinchi imkoniyatni berishni istamadi va shartnomani tugatishga qaror qildi.
Aslida, Jerad Gordon 16 fevral kuni Kaue Fernandes (9-2) bilan jang qilishi kerak edi. Biroq Fernandes viza muammosi tufayli AQShga bora olmadi. Shundan soʻng UFC tashkilotchilari Mashrabjon Roʻziboyevga imkoniyat berish haqida qaror qabul qilgandi.
Mashrabjon Roʻziboyev haqida
28 yoshli oʻzbekistonlik jangchi yengil va yarim oʻrta vazn toifalarida jang qiladi. Uning MMA faoliyatidagi rekordi 20-4-1 boʻlib, soʻnggi 7 ta jangini ketma-ket gʻalaba bilan yakunlagan.
Mashrabjon – UFC jangchisi Nursulton Roʻziboyevning (3-1 UFC) ukasi hisoblanadi. Uning UFCdagi imkoniyati yoʻqqa chiqqani muxlislar uchun kutilmagan xabar boʻldi.
Mashrabjon Roʻziboyevning UFC safidan chiqarilishi ortida vazn tashlashdagi muammolar sabab boʻldi. Hozircha u oʻz faoliyatini qaysi promoushnda davom ettirishi haqida ma'lumot yoʻq. Ammo u oʻzining kuchli texnikasi va muhtasham gʻalabalari bilan yana katta tashkilotlar diqqat markaziga tushishi aniq.
Siz nima deb oʻylaysiz? Mashrabjon Roʻziboyev UFCga qaytish imkoniyatiga ega boʻladimi?
