Madridning "Real" futbol klubi Ispaniya La Ligasi bosh musobaqasining birinchi turida "Osasuna" jamoasiga qarshi 19 avgustga belgilangan o‘yinni boshqa sanaga ko‘chirish bo‘yicha rasmiy murojaat yubordi. Bu haqida Euro-football.ru xabar berdi.
Klub tomonidan AS nashriga ma’lum qilinishicha, Madrid jamoasi va "Osasuna" o‘rtasida muzokaralar o‘tkazilib, o‘yinni 29 oktabrga o‘tkazish taklifi bildirildi. "Real"ning bu so‘rovi jamoaning Klublar Jahon chempionatining yarim final bosqichida ishtirok etishi bilan bog‘liq.
Mazkur musobaqada Madrid jamoasi 9 iyul kuni Parijning "PSJ" jamoasiga qarshi o‘yin o‘tkazadi. Shuningdek, "Real" va futbolchilar kasaba uyushmasi o‘rtasida kelishuvga ko‘ra, jamoa futbolchilari uchun uch hafta ta’til va uch hafta mavsumga tayyorgarlik davri belgilangan.
Agar o‘yin 19 avgust kuni o‘tkazilsa, ushbu tayyorgarlik va dam olish muddati buziladi. Shu sababli o‘yinning sanasini o‘zgartirish muhim hisoblanmoqda.
Klubning ushbu taklifi La Liga rahbariyatiga taqdim etilgan va qaror kutilmoqda.
