Shahboz Umarovning goli va assisti “Turon”ga g‘alaba keltirdi!
Qozog‘iston Premer-ligasining yangi mavsumi start oldi va chempionlik uchun 14 jamoa kurashga kirishdi. Bu mavsumda O‘zbekistonlik futbol ishqibozlari uchun “Turon” klubi alohida e’tibor markazida bo‘ladi. Turkiston viloyati jamoasi katta maqsadlarni ko‘zlab, o‘z tarkibini xorijlik legionerlar bilan mustahkamladi.
O‘zbek legionerlari – “Turon”ning tayanchi
Jamoaning 24 futbolchidan iborat tarkibining yarmi xorijliklar bo‘lib, ular orasida O‘zbekiston, Belarus, Chernogoriya va Rossiyadan kelgan o‘yinchilar bor. O‘zbek futbolchiligining to‘rt vakili – Shahboz Umarov, Odiljon Abdumajidov, Behruz Asqarov va Xurshid Muxtorov jamoaning asosiy figuralaridan biriga aylanishi kutilmoqda.
Shahboz Umarov va Odiljon Abdumajidov Qozog‘iston chempionati muhitini yaxshi biladi, chunki ular bungacha “Ordabasi” safida to‘p surishgan. Tajribali himoyachi Xurshid Muxtorov va yosh iqtidorli Behruz Asqarov esa ilk bor xorij chempionatida o‘z omadini sinab ko‘rmoqda.
G‘alabali start va Shahbozbekning fantastik o‘yini
“Turon” yangi mavsumni o‘z maydonida “Okjetpes”ga qarshi o‘yin bilan boshladi. Uchrashuvda Shahboz Umarov, Odiljon Abdumajidov va Xurshid Muxtorov asosiy tarkibda maydonga tushdi.
Bellashuv qahramoni Shahbozbek Umarov bo‘ldi. U 32-daqiqada Jumabek Abilayxanning uzatmasini aniq zarba bilan darvozaga yo‘llab, hisobni ochdi. Bu gol “Turon”ni ruhlantirdi va ikkinchi taymda jamoa yanada faol harakat qildi.
70-daqiqada Rossiyalik legioner Luka Zguriskiy ikkinchi golni kiritdi va unga Shahbozbek Umarov assistentlik qildi. Bu pas “Turon”ning mavsumni g‘alaba bilan boshlashiga yordam berdi.
Uchrashuv yakunida hisob o‘zgarmadi – “Turon” 2:0 hisobida g‘alaba qozonib, muhim uch ochkoni qo‘lga kiritdi!
Debyut va maydonda to‘liq o‘ynagan o‘zbek futbolchilari
O‘zbekistonlik uch futbolchi – Shahbozbek Umarov, Odiljon Abdumajidov va Xurshid Muxtorov butun uchrashuvni maydonda o‘tkazdi va o‘zini yaxshi tomondan ko‘rsatdi. 89-daqiqada esa Behruz Asqarov zahiradan maydonga tushdi va Qozog‘iston chempionatidagi ilk o‘yinini o‘tkazdi.
Kelgusi uchrashuv – “Aktobe”ga qarshi safar o‘yini
Qozog‘iston chempionatining ikkinchi turi 8-9 mart kunlari bo‘lib o‘tadi. Bu safar “Turon” safarda “Aktobe” mehmoni bo‘ladi va bu uchrashuvda ham zafar quchishni maqsad qilgan.
Legionerlarimiz haqida qiziqarli faktlar
Odiljon Abdumajidov – “Turon”ga “Metallurg” (Bekobod) jamoasidan kelib qo‘shilgan 23 yoshli markaziy himoyachi. U avval “Olimpik” va “Dinamo Samarqand” klublarida ham to‘p surgan.
Xurshidbek Muxtorov – 31 yoshli tajribali himoyachi “Turon”ga Farg‘onaning “Neftchi” klubidan erkin agent sifatida kelib qo‘shildi. Bungacha u O‘zbekistondagi bir qator klublarda, jumladan, “Qo‘qon-1912”, “So‘g‘diyona”, “Lokomotiv” va “Nasaf” safida o‘ynagan.
Behruz Asqarov – 21 yoshli hujumkor futbolchi “Paxtakor” tarbiyalanuvchisi bo‘lib, u o‘yin amaliyoti va tajriba to‘plash uchun bir yilga “Turon”ga ijaraga berilgan.
Shahboz Umarov – 2022 yildan beri Qozog‘iston chempionatida to‘p tepib kelayotgan qanot hujumchisi. U avval “Ordabasi” klubi safida chempionlik va kubok g‘olibligini qo‘lga kiritgan.
Qozog‘iston Premer-ligasining yangi mavsumi qiziqarli boshlandi va “Turon” safidagi o‘zbek legionerlari birinchi o‘yindayoq muhim o‘rin tutdi. Shahbozbek Umarovning gol va assisti jamoani g‘alabaga yetakladi, Abdumajidov va Muxtorov esa himoyada ishonchli o‘yin namoyish etdi.
Kelgusi turda ham o‘zbek legionerlaridan yangi yuksak natijalar kutib qolamiz!
Nodirbek
