Kurtua: PSJga qarshi og‘ir mag‘lubiyat oldik
Madridning “Real” jamoasi darvozaboni Tibo Kurtua Jahon klublar chempionati yarim final o‘yini haqida fikr bildirdi. Bu haqida Euro-football.ru xabar berdi.
Uchrashuv Parij “PSJ” jamoasining 4:0 hisobidagi g‘alabasi bilan yakunlandi. Kurtua so‘zlariga ko‘ra, raqiblar o‘yinni juda faol boshlab, kuchli pressink ko‘rsatishdi.
Jamoamiz murabbiyining topshirig‘iga to‘liq amal qilib, to‘pni ushlab qolish va o‘z uslubimizda o‘ynashga harakat qilish qiyin kechdi. Raqiblar esa bo‘sh o‘yinchilarni topib, ko‘plab xavfli vaziyatlar yaratishga muvaffaq bo‘lishdi.
Birinchi ikki gol o‘yinning kechishini belgilab berdi. Bu og‘ir mag‘lubiyat bo‘lsa-da, undan saboq olish imkoniyati mavjud.
Hozirda biz yo‘lning o‘rtasidamiz va ularning darajasiga yetish uchun hali ko‘p mehnat qilishimiz kerak, dedi Kurtua. Turnirning finali 13 iyul kuni bo‘lib o‘tadi.
Unda amaldagi Chempionlar ligasi g‘olibi “PSJ” Konferensiyalar ligasi g‘olibi “Chelsi” bilan bahs yuritadi.
