Yandex O‘zbekiston Ichki ishlar vazirligi ko‘magida shahar ichidagi harakatni yanada tushunarli va xavfsiz qilish maqsadida yangi tizimni sinovdan o‘tkazishni boshladi. Bu haqida Upl.uz xabar berdi.
Bu haqda Telegramdagi Pik Skartaris kanali xabar berdi. Yangi yechim asosida Yandex Xaritalar va Yandex Navigator ilovalari real vaqtda svetofor signallarini ko‘rsatadi.
Hozirda sinov Toshkentdagi Amir Temur prospekti hamda Tiklanish va Gulyor ko‘chalari chorrahasi hududida o‘tkazilmoqda. Sinov muvaffaqiyatli yakunlansa, bu tizim butun poytaxt bo‘ylab kengaytirilishi rejalashtirilgan.
Ushbu yangilikning asosiy maqsadi haydovchilarga qulaylik yaratishdir. Toshkentda ko‘pincha svetofor signalini aniq ko‘rish qiyin bo‘ladi.
Buning sabablari orasida quyosh nuri ko‘zga tegishi, katta transport vositalari ko‘rishni to‘sib qo‘yishi yoki boshqa to‘siqlar bo‘lishi mumkin. Shunday vaziyatlarda navigator haydovchining “ikkinchi ko‘ziga” aylanib, haydovchilar, ayniqsa yangi boshlovchilar uchun stress va bezovtalik darajasini kamaytiradi.
Bundan tashqari, ushbu texnologiya kelajakda yanada rivojlantirilish imkoniyatlarini beradi. Masalan, ilovaga svetoforning yashil yoki qizil signaliga o‘tish vaqtini ko‘rsatadigan taymerlar qo‘shilishi mumkin.
Toshkentda hozircha bunday taymerlar kam bo‘lgani sababli, “raqamli taymer” navigator orqali haydovchilarga signal o‘zgarishini oldindan bilish imkonini beradi. Bu esa: - signal o‘zgarishini oldindan bilish orqali harakatni rejalashtirishga yordam beradi; - to‘satdan tormozlashlarni kamaytiradi, bu esa avariyalar xavfini pasaytiradi va harakatni silliq qiladi; - yo‘l chorrahalarida kelib chiqadigan nizolar sonini kamaytiradi; - yonilg‘i sarfini tejashga yordam beradi.
Svetoforlarning raqamlashtirilishi nafaqat alohida haydovchilar, balki butun shahar transport tizimi uchun ham muhimdir. Bu texnologiya shahar xizmatlariga tirbandliklarni aniqroq oldindan ko‘rish va yo‘l harakati marshrutlarini optimallashtirish imkonini beradi, natijada transport logistikasi yaxshilanadi va yo‘llardagi yuklama kamayadi.
Shu bilan yangi tizimning sinovi yaxshi boshlanganini aytish mumkin. Endi butun Toshkentda joriy etilishini kutamiz.
Uning amaliy ishlashini namoyish etuvchi video orqali ham ko‘rish mumkin.
