Toyota Belgiyada oʻtkazilgan tadbirda yangi yuk mashinasi siluetini aks ettirgan tizerni namoyish etdi. Tadbirda bZ4X, C-HR+ va Lexus RZ modellarining premyerasi boʻlib oʻtdi. Tizerda koʻrsatilgan pikap kelajakdagi elektr Hilux bilan bogʻliq emasligi taxmin qilinmoqda.
Toyota 2026-yilgacha Yevropada oltita yangi elektr avtomobilini taqdim etishni rejalashtirmoqda.
Tizerdagi pikap ikki qatorli kabinaga ega boʻlib, bu uni 2023-yilda namoyish qilingan elektr Hilux prototipidan farqlaydi. Bunday Hilux modeli Taylandda ishlab chiqariladi, chunki u yerda yonilgʻi bilan ishlovchi pikaplar Toyota savdolarining yarmidan koʻpini tashkil qiladi. Bundan tashqari, tizerdagi siluet Avstraliyada sinovdan oʻtkazilayotgan elektr Hilux bilan ham oʻxshash emas.
Shu bilan birga, pikap silueti Toyota EPU Concept 2023 dizayniga juda oʻxshash. U oʻz oʻlchamlari bilan Ford Maverick’ga yaqin boʻlgan oʻrta oʻlchamli elektr pikapni namoyon etadi. Ushbu kontsept avtomobil yuk boʻlimining uzunligini oshirish imkonini beruvchi oʻzgartiriladigan orqa bort hamda chuqur joylashtirilgan asboblar paneli bilan ajralib turadi.
Toyota ushbu modelni 2027-yilda bozorga chiqarishi kutilmoqda. Shu yilning oʻzida, kompaniyaning Corolla modelini ham pikapga aylantirish rejasi borligi haqida mish-mishlar tarqalgan edi. U Hilux’dan bir pogʻona past turadigan va Ford Maverick hamda Hyundai Santa Cruz’ga raqobatchi boʻladigan model sifatida tilga olingan.
