Chevrolet yangi Spark EUV’ni taqdim etdi

Chevrolet o‘zining yangi ixcham krossoverini taqdim etdi. Biroq, model to‘liq amerikaliklar tomonidan ishlab chiqilmagan – u aslida xitoylik Baojun Yep Plus bo‘lib, Chevrolet brendi ostida chiqarildi.

Braziliyada qisqa taqdimot va bir nechta tizerlardan so‘ng, Chevrolet yangi elektr krossoverining rasmiy tasvirlarini e’lon qildi. Shu bilan birga, modelga avval hatchback bo‘lgan Spark nomi berilishi tasdiqlandi. Janubiy Amerika bozori uchun u Chevrolet Spark EUV nomi bilan taqdim etiladi. Shuningdek, avtomobilning orqa qismida "Activ" yozuvi mavjud bo‘lib, u ehtimol, komplektatsiyani bildiradi.

Spark EUV aslida Xitoyda GM va SAIC kompaniyalari hamkorligida ishlab chiqarilgan Baojun Yep Plus’ning nusxasi hisoblanadi. Model faqat besh eshikli versiyada taqdim etilgan bo‘lib, uch eshikli varianti ko‘zda tutilmagan.

Dizaynda Chevrolet Spark EUV asosan Baojun Yep Plus’ni takrorlaydi, yagona farq – logotip va brend belgilari. Model kvadrat shakldagi kuzov, keng bamperlar, LED faralar, vertikal orqa chiroqlar va yon tomonga ochiladigan yukxona eshigi bilan ajralib turadi. Xitoy versiyasining o‘lchamlari: uzunligi 3996 mm, kengligi 1760 mm, balandligi 1726 mm va g‘ildirak bazasi 2560 mm.

Ichki makonda ham Spark EUV Baojun Yep Plus dizaynini takrorlaydi. Rulda Chevrolet logotipi bor, old panelda esa alohida raqamli asboblar paneli va multimedia ekrani joylashgan. O‘rindiqlar orasida suzuvchi podlokotnik mavjud. Braziliya bozorida model mahalliy talablarga moslashtirilgan variantda taqdim etiladi.

Texnik xususiyatlar hali rasman e’lon qilinmagan, ammo donor model Baojun Yep Plus old g‘ildirak harakatlantirish tizimi va 102 ot kuchiga ega motor bilan jihozlangan. Model 41,9 kVt/soatli akkumulyatorga ega bo‘lib, CLTC sinovlariga ko‘ra 401 km masofani bosib o‘ta oladi.

Yangi Chevrolet Spark EUV’ning to‘liq taqdimoti yaqin kunlarda bo‘lib o‘tadi. Model Lotin Amerikasi bilan birga Yaqin Sharq mamlakatlarida ham sotuvga chiqariladi. Chevrolet ilgari ham Xitoy modellarini o‘z brendi ostida chiqarib kelgan. Masalan, Chevrolet Captiva, Chevrolet Groove va Chevrolet S10 Max ham aslida xitoylik modellarning nusxalari hisoblanadi.