Germaniyada tibbiyot xodimi smenani «tinch o‘tkazish» uchun 9 kishini o‘ldirganlikda ayblandi
Foto: Rhein-Maas Klinikum
Germaniya g‘arbidagi shifoxonada ishlagan tibbiyot xodimi 9 bemorni o‘ldirishda va yana 34 bemorni o‘ldirishga urinishda ayblanmoqda, deb xabar berdi Bild mahalliy prokuraturaga tayanib.
Erkak Vyurselen shahridagi klinika xodimi bo‘lgan. 2024 yilda shifoxona rahbariyati uning ishidagi shubhali holatlarni payqab, politsiyaga murojaat qilgan.
Xodim 2024 yil iyul oyida hibsga olingan va 11 ta qotillikka urinishda ayblangan. Tibbiyot xodimining qurbonlari va jabrdiydalari sonini aniqlash uchun huquq-tartibot idoralari bir qancha jasadni eksgumatsiya qilgan.
Fevral oyida prokurorlar xodim 5 kishini o‘ldirgani va yana 25 bemorni o‘ldirmoqchi bo‘lganini aytdi. Keyinchalik bu ishga yana to‘rtta qotillik va to‘qqizta qotillikka urinish qo‘shildi.
Xodim palliativ yordam bo‘limida ishlagan, u yerda og‘ir yoki o‘ta og‘ir bemorlar simptomlarini yengillashtirish uchun yordam oladi. Tergov ma’lumotlariga ko‘ra, erkak bemorlarga og‘riq qoldiruvchi yoki tinchlantiruvchi dorilarni quyishda dozani qasddan, haddan tashqari oshirib yuborgan. Shu tariqa tibbiyot xodimi noxush hodisasiz tungi smenani «tinchgina» o‘tkazishga harakat qilgani ta’kidlanmoqda.
Aahen prokuraturasi 44 yoshli erkakka ayblov e’lon qilgan.
Gumonlanuvchining qurbonlari orasida shifoxonadan javob beriladigan bemorlar ham bo‘lgani ta’kidlanmoqda. Jabrlanganlarning ba’zilari tinchlantiruvchi dori vositalarining haddan tashqari katta dozasi tufayli jiddiy oqibatlarga duch kelgan. Qayd qilinishicha, tergov harakatlari davom etmoqda.
