Zelenskiy: Rossiya urushni uzaytirishni maqsad qilgan
Ukraina prezidenti Volodimir Zelenskiy Rossiya prezidenti Vladimir Putinning AQSH prezidenti Donald Tramp tomonidan taklif qilingan 30 kunlik tanaffus g‘oyasini qo‘llab-quvvatlashi haqidagi bayonotga javob qaytardi. Uning ta’kidlashicha, Rossiya bu taklifni amalda rad etdi va Ukrainaga qarshi harbiy harakatlarni davom ettirmoqda.
Zelenskiy Rossiyaning yangi hujumlari haqida ma’lumot berib, 19 mart kuni kechasi osmonda 40 ga yaqin «shahed» dronlari harakat qilganini ta’kidladi. «Hozir ko‘plab mintaqalarda Rossiyaga aslida nima kerakligi eshitilmoqda. 40 ga yaqin "shahedlar" osmonimizda, HHM ishlamoqda», – deb yozdi Ukraina prezidenti. Uning so‘zlariga ko‘ra, Rossiya, ayniqsa, fuqarolik infratuzilmasiga zarbalar bermoqda. Zelenskiy Sumidagi kasalxonaga dron zarba bergani, shuningdek, Donetsk viloyatidagi shaharlarga ham hujum qilinganini qayd etdi.
Rossiya dronlari hozirda Kiyev, Jitomir, Sumi, Chernixiv, Poltava, Xarkiv, Kirovohrad, Dnipropetrovsk va Cherkassk viloyatlari osmonida kuzatilmoqda. Zelenskiy xalqaro hamjamiyatni Rossiyaga qarshi yangi sanksiyalar joriy etish, Ukrainaga ko‘proq yordam ko‘rsatish va xavfsizlik kafolatlarini ta’minlashga chaqirdi.
Kanada Zelenskiyni G7 sammitiga taklif qildi
Kanada bosh vaziri Mark Karni Ukraina prezidenti Volodimir Zelenskiyni 15-17 iyun kunlari Albertada bo‘lib o‘tadigan G7 sammitiga taklif qildi. Bu haqda Kanada hukumati vakili AFP agentligiga ma’lum qildi. Uning aytishicha, Karni 16 mart kuni Zelenskiy bilan suhbatlashgan va unga Ukraina mudofaasi hamda global tinchlikni ta’minlash borasidagi yangilangan ma’lumotlarni taqdim etgan.
Kanada Ukrainaning Rossiya agressiyasiga qarshi kurashini qat’iy qo‘llab-quvvatlashini tasdiqladi. Karni Zelenskiy bilan suhbatni «yaxshi va mazmunli» deb baholadi va Kanada tomonidan ko‘rsatilayotgan mudofaa yordami hamda energetika sektorini qo‘llab-quvvatlash ishlari davom ettirilishini ta’kidladi. Zelenskiy esa Karniga Moskvaga bosimni kuchaytirishga oid «yaxshi fikrlari» uchun minnatdorlik bildirdi.
Ukraina rahbarining so‘zlariga ko‘ra, butun dunyo Putinning urushni davom ettirishga urinayotganini rad etishi kerak. U xalqaro hamjamiyatni yanada qat’iy choralar ko‘rishga chorladi.
