Sobiq Twitter logotipi kimoshdi savdosida 34,4 ming dollarga sotildi

RR Auction kimoshdi savdosida sobiq Twitter'ning moviy qush ko‘rinishidagi logotipi 34 375 dollarga sotildi. Ijtimoiy tarmoq nomi X'ga o‘zgarganidan so‘ng ushbu belgi kompaniyaning San-Fransiskodagi sobiq bosh qarorgohidan olib tashlangandi.

RR Auction xabariga ko‘ra, sotilgan logotipning o‘lchamlari 3,7 metrga 2,7 metr, og‘irligi esa 254 kilogrammni tashkil etadi. Xaridorning ismi oshkor qilinmagan.

Avval Ilon Mask sobiq Twitter ofislaridagi mebellar va professional oshxona jihozlarini kimoshdi savdosiga qo‘ygan edi.

Ijtimoiy tarmoqni sotib olganidan keyin Mask ofis ijarasi va shartnomalar bo‘yicha majburiyatlarini o‘z vaqtida bajarmagan, deb yozadi ABC News. Shuningdek u xodimlar sonini keskin qisqartirgan.

OAVga ko‘ra, Mask sobiq Twitter buyumlarini sotish orqali kompaniyaning avvalgi rahbariyati qilgan ortiqcha xarajatlarni ko‘rsatib berishni istagan. Shuningdek, Mask kompaniya xarajatlarini qisqartirish o‘zi uchun ustuvor maqsad ekanini namoyish etmoqchi bo‘lgan.

Eslatib o‘tamiz, 2022 yil aprel oyida Ilon Mask Twitter'ni 44 milliard dollarga sotib oldi. 2023 yil iyul oyida u ijtimoiy tarmoq nomini va logotipini X'ga o‘zgartirdi.