Zelenskiy uchta o‘zbek kompaniyasiga sanksiya joriy qildi

Ukraina prezidenti Vladimir Zelenskiy uchta o‘zbek kompaniyasi va bir nafar O‘zbekiston fuqarosiga nisbatan sanksiyalar joriy qildi, deb Kursiv Media xabar berdi.

Sanksiyalar 9-maydan kuchga kirdi va 10 yil davomida amal qiladi. Ushbu chora-tadbirlar Mercury Renaissance qo‘shma korxonasi va uning tarkibidagi Fergana Chemical Plant kompaniyasiga qarshi qaratilgan.

Mercury Renaissance kompaniyasi Toshkentda ro‘yxatdan o‘tgan bo‘lib, 2016-yildan beri qurilish texnikalarini lizing va ijaraga berish bilan shug‘ullanadi. Kompaniyaning asoschilari — Rustam Muminov va Shahriyor Tojiyev.

Rustam Muminovga nisbatan ham shaxsiy sanksiyalar joriy etilgan. Zelenskiyning farmoniga ko‘ra, unga nisbatan "mos choralar" ko‘riladi.

Sanksiyalar Jizzaxda joylashgan, sellyuloza va qog‘oz xomashyosini ishlab chiqaruvchi Raw Materials Cellulose kompaniyasiga ham taalluqli.

Ukraina sanksiyalar ro‘yxatiga Rossiya, Xitoy, Eron va Belarus kompaniyalari ham kiritilgan.