Dunyodagi eng baxtli shaharlar reytingi e’lon qilindi: kuchli o‘nlikda qaysi shaharlar bor?

Happy City Index xalqaro tashkiloti tomonidan an’anaviy tarzda e’lon qilinadigan yillik reyting natijalariga ko‘ra, Daniya poytaxti Kopenhagen 2025 yilda rekord darajada yuqori – 1039 ball bilan dunyodagi eng baxtli shahar sifatida birinchi o‘rinni egalladi.

Mutaxassislarning fikricha, Kopenhagenning reytingda peshqadam bo‘lishi kutilmagan holat emas, balki shaharda yillar davomida olib borilgan aniq siyosiy va ijtimoiy qarorlar natijasidir. Ushbu shahar yuqori darajada barqaror rivojlanishga ega bo‘lib, atrof-muhit tozaligi, ekologik jihatdan qulay transport tizimi va shahar aholisining salomatligi uchun qulay infratuzilma bilan ajralib turadi.

Qayd etilishicha, Kopenhagendagi sayohatlarning deyarli 70 foizi velosiped va jamoat transporti orqali amalga oshiriladi. Shu bilan birga, shaharda noyob bo‘lgan «Baxt muzeyi» mavjud bo‘lib, bu konsepsiyani ilmiy va madaniy jihatdan keng o‘rganish imkonini beradi.

Syurix – iqtisodiy barqarorlik timsoli

Ikkinchi o‘rinni 993 ball bilan Shveysariyaning Syurix shahri qo‘lga kiritdi. Ushbu shahar iqtisodiy jihatdan barqarorligi, yuqori sifatli sog‘liqni saqlash tizimi va atrof-muhitni muhofaza qilish bo‘yicha olib borilayotgan ilg‘or siyosatlari bilan katta bahoga loyiq ko‘rildi.

Singapur – Osiyoning eng baxtli shahri

Uchlikni esa Osiyoning eng baxtli shahri deb tan olingan Singapur yakunladi. 979 ball bilan uchinchi o‘rinni egallagan bu shaharning asosiy yutuqlari – yuqori sifatli ta’lim tizimi, ishsizlikning yo‘qligi darajasidagi past ko‘rsatkichlari va aholining ijtimoiy faolligi hisoblanadi.

Orxus va Antverpen ham yuqori baholandi

Kuchli beshlikdan Daniyaning yana bir shahri Orxus (958 ball) ham o‘rin oldi. Orxus kuchli iqtisodiyoti va fuqarolarning boshqaruv jarayonlariga yuqori darajadagi jalb qilinishi bilan ajralib turadi. Beshinchi o‘rin esa 956 ball bilan Belgiyaning Antverpen shahriga nasib etdi.

Antverpen bu yil Janubiy Koreya poytaxti Seulni ortda qoldirib, birinchi beshlikka kirishni uddaladi.

Kuchli o‘nlikda yana qaysi shaharlar bor?

Reytingning eng yuqori o‘nligida, shuningdek, Stokholm (Shvetsiya), Taypey (Tayvan), Myunxen (Germaniya), Rotterdam (Niderlandiya) va Vankuver (Kanada) kabi shaharlar o‘rin oldi.

30 talikda esa Vena, Parij, Nyu-York, Jeneva va Barselona kabi mashhur megapolislar ham mavjud.

Markaziy Osiyo shaharlari 200 talikka ham kirolmadi

Hisobotda qayd etilishicha, baxtli shahar bo‘lish uchun faqat yuqori daromad yoki qulay iqlimning o‘zi yetarli emas, balki shaharning infratuzilmasi, sog‘liqni saqlash tizimi, ekologiya va ijtimoiy hamkorlik yo‘nalishlaridagi aniq va mukammal shahar siyosatlari zarurdir.

Biroq, afsuski, Markaziy Osiyodagi mamlakatlar, jumladan, O‘zbekiston, Qozog‘iston, Qirg‘iziston, Tojikiston va Turkmaniston shaharlari bu reytingning eng yuqori 200 taligiga ham kira olmagan.

Shuningdek, ushbu reytingga Ozarbayjon, Mo‘g‘uliston va BAA shaharlari ham kiritilmaganligi ta’kidlanmoqda.

Zamin.uz tahririyati xalqaro reytinglarni diqqat bilan kuzatib, sizni dunyodagi eng qiziqarli va muhim yangiliklardan boxabar etib turadi. Biz bilan qoling!