Sankt-Peterburg shahrida istiqomat qiluvchi talabaning «Aeroflot» aviakompaniyasiga qarshi da’vosi sudda ko‘rib chiqilib, uning foydasiga qaror chiqarildi. Bu haqda shahar sudlari birlashgan matbuot xizmati ma’lum qildi.
Hodisa Sankt-Peterburg—Istanbul yo‘nalishi bo‘yicha amalga oshirilishi kerak bo‘lgan aviareys bilan bog‘liq. Robert Puchkov ismli yigit Turkiyaga yo‘l olish uchun ushbu aviareysga o‘z vaqtida yetib kelganiga qaramay, aviakompaniya xodimlari uni samolyotga chiqarishdan bosh tortgan. Ular bu qarorni talaba Turkiyaga kirish uchun zarur bo‘lgan hujjatlarga ega emasligi bilan izohlagan.
Ammo talabaning aytishicha, u pasporti va talabalarga mo‘ljallangan yashash guvohnomasini taqdim etgan, shuningdek, Turkiyaga imtihon topshirish uchun ketayotganini ham ma’lum qilgan. Barcha zaruriy hujjatlarning mavjudligiga qaramasdan, «Aeroflot» uni borishi kerak bo‘lgan manzilga yetkazib qo‘yishni rad etgan.
Bunday vaziyatda talabaga shoshilinch ravishda boshqa marshrut bilan chipta sotib olishga to‘g‘ri kelgan. U Sankt-Peterburg—Dubay—Istanbul yo‘nalishi bo‘yicha yangi aviachipta olib, natijada, manzilga yetib borgan. Ammo bu ortiqcha vaqt va xarajatlarga sabab bo‘lgan.
Shu sababdan Robert Puchkov aviakompaniyaga qarshi moddiy va ma’naviy zararni qoplash talabi bilan sudga murojaat qildi. U o‘z da’vosida 121 ming rubl (taxminan 1500 AQSH dollari) kompensatsiya to‘lashni talab qilgan. Bu summaga to‘g‘ridan to‘g‘ri reys uchun sotib olingan chipta narxi, qo‘shimcha xarid qilingan boshqa yo‘nalishdagi chipta xarajatlari, taksi xizmati uchun qilingan to‘lovlar hamda ma’naviy zarar kirar edi.
Sud talabaning da’vosini qisman qondirib, Puchkovning foydasiga aviachipta uchun 34,7 ming rubl, qo‘shimcha xarajatlar uchun jami 68,9 ming rubl, ma’naviy zarar uchun esa 5 ming rubl miqdorida pul undirish haqida qaror chiqargan. Bundan tashqari, «Aeroflot» aviakompaniyasi 54 ming rubl jarima to‘lashi lozim deb topilgan.
Ushbu voqea jamoatchilik e’tiborini jalb qilib, aviatashuvchilar tomonidan yo‘lovchilar huquqlariga rioya etilishi muhim ekanligini yana bir bor ko‘rsatdi.
