Indoneziyaning sharqiy qismida joylashgan Levotobi Laki-laki vulqoni yana faollashdi. CNBC Indonesia va Central Asia nashrlarining yozishicha, mazkur tabiiy hodisa mintaqa aholisini va rasmiy idoralarni jiddiy xavotirga solmoqda.
Tutun ustuni osmonga chiqdi
Vulqondan ko‘tarilgan kul va g‘uvallangan tutun ustuni 5,5 km balandlikka, ya’ni dengiz sathidan taxminan 7 ming metrgacha yetib bordi. Ogohlik darajasi oshirildi, hukumat vulqon faolligini III darajadan IV darajaga ko‘tardi — bu esa eng yuqori xavf belgisi hisoblanadi.
Shamol kulni tarqatmoqda
Mutaxassislarning qayd etishicha, shamolning doimiy harakati kul zarrachalarini keng hududga tarqatmoqda. Bu esa vulqon faolligining hali ham beqaror va yuqori darajada ekanidan dalolat beradi. Shu sababli fuqarolarga tabiiy xavf ehtimoli bor hududlardan uzoqda bo‘lish tavsiya etilmoqda.
6–7 km radiusda yaqinlashish taqiqlandi
Mahalliy hokimiyat va qutqaruv xizmati aholiga, ayniqsa, sayyohlarga vulqon atrofida 6–7 km radiusga yaqinlashmaslikni, hamda xotirjamlikni saqlashni tavsiya qildi. Yomg‘irli ob-havo sharoitida lava oqimlari va toshqin xavfi ham e’tibordan chetda qolmasligi ta’kidlandi.
Zamin.uz tahririyatidan:
Levotobi vulqonining faollashuvi Indoneziyaning seysmik jihatdan faol mintaqa ekanini yana bir bor eslatmoqda. Tabiiy ofatlarga tayyorlik va xavfsizlik choralarini ko‘rish – har bir fuqaroning va davlat organlarining birinchi vazifasidir. Biz jarayonni diqqat bilan kuzatamiz.
