Tinch okeanida tutilgan "o‘zga sayyoralik" – aslida nima?
Yaqinda rossiyalik baliqchi Roman Fedorsovning noodatiy ovi internetda keng tarqaldi. U Tinch okeanidagi baliq ovlash ekspeditsiyasi davomida o‘ziga xos, g‘ayrioddiy ko‘rinishdagi jonzotni qo‘lga oldi. Tasvirlarga ko‘ra, bu maxluq shishgan va bo‘rtib chiqqan tanasi, katta ochilgan og‘zi va hayratda qoldiruvchi ko‘zlari bilan inson boshiga o‘xshab ketadi.
Hodisa ijtimoiy tarmoqlarda qizg‘in muhokamalarga sabab bo‘ldi. Ko‘pchilik uni "o‘zga sayyoralik" yoki sirli dengiz maxluqi deb atadi. Biroq, Roman Fedorsov bu taxminlarni rad etib, bu jonzot chuqur dengizda yashovchi aptotsiklus (Smoothhead Blobfish – silliq qurbaqa balig‘i) ekanligini ta’kidladi.
Nega bu baliq bunchalik g‘alati ko‘rinishda?
Aptotsikluslar 1700 metrgacha chuqurlikda yashaydigan baliq turlaridan biri hisoblanadi. Ular odatda yupqa teri va muloyim mushak tuzilishiga ega bo‘lib, yuqori bosimli muhitga moslashgan. Chuqur dengizdagi kuchli bosim ularning tanasini shaklda ushlab turishga yordam beradi. Lekin, baliq to‘rga ilinib, suv yuzasiga olib chiqilganda, bosim keskin o‘zgarishi tufayli uning tanasi shishib ketadi. Bu esa unga g‘aroyib, "o‘zga sayyoralik" kabi ko‘rinish beradi.
Fedorsovning noodatiy ovlari
Roman Fedorsov bunday g‘ayrioddiy dengiz jonzotlarini uchratishda yangilik emas. U o‘zining Telegram va Twitter sahifalarida okean tubidan tutilgan ajib-gajib maxluqlarning suratlarini tez-tez baham ko‘radi. Uning ushbu topilmasi ham yana bir bor tabiatning nechog‘lik hayratlanarli va xilma-xil ekanini isbotladi.
Bu voqea yana bir bor inson zoti dengiz tubidagi hayot haqida juda oz ma’lumotga ega ekanligini ko‘rsatib turibdi. Balkim, hali kashf etilmagan yana ko‘plab jonzotlar bordir?
