Prezident opera artistini taqdirladi

Oʻzbekiston Respublikasi Prezidentining «O.Nazirovga «Oʻzbekiston Respublikasida xizmat koʻrsatgan artist» faxriy unvonini berish toʻgʻrisida»gi Farmoni e'lon qilindi.

Oʻzining yorqin iste'dodi, ijro mahorati bilan oʻzbek opera san'atini va milliy madaniyatimizni rivojlantirish, uning shon-shuhratini yuksaltirishga qoʻshgan munosib hissasi, xalqaro miqyosda ijodiy aloqalarni mustahkamlash, xalqimizni jahon mumtoz musiqasidan bahramand etish, yoshlarning san'at olamiga qiziqishi va mehrini oshirish, ularni Vatanga muhabbat, umuminsoniy qadriyatlarga hurmat ruhida tarbiyalash borasidagi ibratli ishlari hamda ijtimoiy hayotdagi faol ishtiroki uchun Oʻzbekiston davlat simfonik orkestri opera artisti Nazirov Otabek Baxadir oʻgʻliga «Oʻzbekiston Respublikasida xizmat koʻrsatgan artist» faxriy unvoni berilsin, deyiladi farmonda.