O'zbekistonda poliklinikalar yangi tizimga o'tmoqda
7 may kuni Prezident Shavkat Mirziyoyev tibbiy xizmatlar sifatini oshirish, dori vositalaridan samarali foydalanish va tibbiy ta’limni takomillashtirish masalalariga bag‘ishlangan yig‘ilish o‘tkazdi, deb nova24.uz sayti xabar berdi.
Yig‘ilishda davlat rahbari O‘zbekistonda poliklinikalar faoliyatining butunlay o‘zgarishini ma’lum qildi. Yangi tartibga ko‘ra, tibbiy brigada va unga biriktirilgan aholi o‘rtasida ikki tomonlama shartnoma tuziladi, bu orqali tomonlarning huquq va majburiyatlari belgilanadi. Fuqarolar o‘z oilaviy shifokorini mustaqil tanlash huquqiga ega bo‘ladi. Bu mutaxassislar tarkibiga xususiy shifokorlar ham kiradi.
Shuningdek, davlat tomonidan kafolatlangan tibbiy yordam paketi tasdiqlandi. Unga ko‘ra, tibbiy xizmatlar va dori-darmonlar to‘liq davlat byudjeti hisobidan qoplanadi.
Poliklinikalarda ginekolog shifokorlar soni ikki baravar oshiriladi. Har 3000 nafar bolaga bitta yangi pediatr biriktiriladi.
Endi boshlang‘ich tibbiy yordam tizimida 0,5 yoki 0,25 stavkada ishlash bekor qilinadi. Barcha shifokorlar va hamshiralar to‘liq ish vaqtida faoliyat yuritadi.
Har bir tumanda uchastka va oilaviy shifokor punktlari, poliklinikalar faoliyati optimallashtiriladi. 12 mingdan ortiq aholiga xizmat ko‘rsatayotgan 7 ta yirik poliklinika kichik poliklinikalarga aylantiriladi. Tuman markaziy poliklinikasi esa tor sohadagi mutaxassislar faoliyat yuritadigan maslahat-diagnostika bo‘limiga aylantiriladi.
