«Lids» hujumchisini 12 million yevroga sotmoqchi

The Sun nashrining ma’lumotlariga ko‘ra, «Lids» klubi hujumchi Mateo Jozefni sotish variantini ko‘rib chiqmoqda. Bu haqida Euro-football.ru xabar berdi.

Bu orqali jamoa hujum chizig‘ini kuchaytirish uchun mablag‘ ajratmoqchi. Klub «Fulxem» jamoasining hujumchisi Rodrigo Munisni sotib olishga qiziqmoqda, biroq London klubi o‘z futbolchisi uchun 70 million yevro so‘ramoqda.

Shu bilan birga, «Lids» 21 yoshli Jozefning huquqlarini 12 million yevroga baholagan va ushbu savdo orqali yangi futbolchini sotib olish xarajatlarini qisman qoplamoqchi. 2024/25-yilgi mavsumda Mateo Jozef barcha musobaqalarda «Lids» safida 41 o‘yinda maydonga tushib, uchta gol urdi va to‘rtta golli uzatma amalga oshirdi.

Uning klublik shartnomasi 2028-yil 30 iyungacha amal qiladi. Transfermarkt ma’lumotlariga ko‘ra, futbolchining bozor qiymati 3,5 million yevroni tashkil etadi.

Jamoa rahbariyati ushbu o‘zgarish orqali hujumni yanada kuchaytirishni maqsad qilgan.