O‘ng qanot himoyachisi Emerson Royal vatani Braziliyaga qaytdi. Bu haqida Euro-football.ru xabar berdi.
Braziliyalik futbolchi «Milan» klubidan «Flamengo» jamoasiga o‘tdi, bu haqda Rio-de-Janeyro klubi matbuot xizmati ma’lum qildi. 26 yoshli futbolchining shartnomasi 2028 yil oxirigacha mo‘ljallangan.
Emerson Royal «Milan» safida faqat bir mavsum o‘ynadi. O‘tgan yil yozida «rossoneri» uni Londonning «Tottenhem» klubidan 15 million yevroga sotib olgan edi.
Transfermarkt ma’lumotlariga ko‘ra, «Flamengo» himoyachini 9 million yevroga xarid qildi. Futbolchi «Milan» jamoasi safida barcha turnirlarda jami 26 o‘yinda maydonga tushdi, ammo gol yoki assist qayd etolmadi.
Hozirda «Flamengo» Braziliya Seriya A chempionatida ikkinchi o‘rinda bormoqda. Jamoa peshqadam «Kruzeyro»dan atigi bir ochko kam, ammo ularning bir o‘yini zaxirada saqlanmoqda.
