“Napoli” va “Atalanta” Trossard transferiga qiziqmoqda
Londonning “Arsenal” jamoasi hujumchi qanot o‘yinchisi Leandro Trossardga boshqa klublar qiziqishni davom ettirmoqda. Bu haqida Euro-football.ru xabar berdi.
Avvalroq 30 yoshli futbolchini o‘z safiga qo‘shib olish niyatida Turkiyaning “Fenerbahche” va Germaniyaning “Borussiya Dortmund” klublari borligi ma’lum bo‘lgandi. Yaqinda esa Trossardga Italiya klublari – “Napoli” va “Atalanta” ham qiziqish bildirayotgani haqida xabarlar paydo bo‘ldi.
“Napoli” klubi Trossard nomzodini ko‘rib chiqmoqda, chunki ular avval “Bolonya” futbolchisi Dan Ndo’y bilan muzokaralarda kelishuvga erisha olmadi. “Atalanta” esa o‘z safidagi Ademola Lukmanning o‘rniga yangi futbolchi izlamoqda.
Lukman esa o‘z navbatida “Inter” jamoasiga o‘tishni rejalashtirmoqda. Transfermarkt portali mutaxassislarining fikriga ko‘ra, Leandro Trossardning transfer qiymati 22 million yevroga teng.
Futbolchining “Arsenal” bilan amaldagi shartnomasi 2025/26 yilgi mavsum yakunida nihoyasiga yetadi. Shu bois, Trossard kelajagi borasida turli mish-mishlar paydo bo‘lmoqda, uning qaysi klubda faoliyatini davom ettirishi hozircha aniq emas.
