Chelsi Armando Broyani 29 million yevroga sotmoqchi
«Chelsi» hujumchisi Armando Broya joriy yozda klubni tark etishi mumkin. Bu haqida Euro-football.ru xabar berdi.
Klub rahbariyati alban futbolchisiga ishonch bildirmayapti, chunki u o‘tgan mavsumni «Everton»da ijarada o‘tkazdi va o‘zini ko‘rsata olmadi. The Athletic nashrining ma’lumotiga ko‘ra, 23 yoshli hujumchi so‘nggi paytlarda qiyinchiliklarga duch kelgan bo‘lsa-da, London klubi uni 25 million funt sterling (taxminan 29 million yevro) qiymatida sotuvga qo‘ymoqchi.
Armando Broya o‘tgan mavsum «Everton» tarkibida 11ta o‘yin o‘tkazdi, biroq gol yoki samarali uzatma bilan ajralib chiqa olmadi. Futbolchi mavsumning katta qismini jarohatlar tufayli o‘tkazib yubordi.
Transfermarkt portali Broya qiymatini 12 million yevroga baholagan. Broya va «Chelsi» o‘rtasidagi shartnoma 2028 yil yozigacha amal qiladi.
Klub Broya uchun yuqori narx belgilagan bo‘lsa-da, uning kelajagi hozircha mavhumligicha qolmoqda. London klubi futbolchini sotish yoki ijaraga berish masalasini joriy transfer oynasida hal qilishi kutilmoqda.
