"Manchester Yunayted" hujumchisi Rasmus Xoylun o‘zining klubdan ketishni rejalashtirmayotganini ma’lum qildi. Bu haqida Euro-football.ru xabar berdi.
Uning ta’kidlashicha, "Milan" va "Yuventus" klublari tomonidan qiziqish bo‘layotganiga qaramay, u faoliyatini Manchesterda davom ettirmoqchi. Futbolchining so‘zlariga ko‘ra, u raqobatdan qo‘rqmaydi va aynan raqobat o‘sishiga yordam berishini biladi.
Xoylun hozirda 22 yoshda va u hali ham o‘z ustida ishlashda davom etmoqda. O‘tgan mavsum unchalik oson bo‘lmaganini, biroq bu tajriba uning rivojlanishiga ijobiy ta’sir ko‘rsatganini ta’kidladi.
Xoylun intervyusida: "Qolishni va har qanday holatda ham jamoadagi o‘rnim uchun kurashishni istayman. Raqobat meni kuchliroq qiladi va unga tayyorman.
Menga atigi 22 yosh, ko‘pchilik hujumchilar bu yoshda hali yuzta gol urmaydi. O‘tgan mavsum murakkab kechdi, yaxshi o‘ynashim mumkin edi, lekin biz to‘g‘ri yo‘ldamiz va yana ham kuchliroq bo‘lishga intilamiz", dedi.
Eslatib o‘tamiz, o‘tgan mavsum Angliya Premer-ligasida Xoylun 32 o‘yinda maydonga tushib, to‘rt gol urgan. "Manchester Yunayted" uni ikki yil avval "Atalanta" klubidan 80 million yevroga xarid qilgan edi.
