Soriyano Holand va Ronaldu xarakterini solishtirdi
“Manchester Siti” futbol klubi bosh direktori Ferran Soriyano hujumchi Erling Holandning xarakteri haqida fikr bildirdi va uni mashhur futbolchi Krishtianu Ronaldu bilan taqqoslab o‘tdi. Bu haqida Euro-football.ru xabar berdi.
Uning so‘zlariga ko‘ra, Ronaldu jamoadoshi gol urganida ko‘pincha quvonmaydi, chunki u “Bu golni men urishim kerak edi” deb o‘ylaydi. Bu uning yomon odam ekanini anglatmaydi, shunchaki, Ronaldu shunday dunyoqarashga ega.
Erling Holand esa boshqacha. U ko‘plab gollar muallifi bo‘lsa-da, jamoadoshlari ham gol urganda bundan mamnun bo‘ladi va ular uchun xursand bo‘ladi, deydi Soriyano.
Ma’lumotlarga ko‘ra, Erling Holand Angliyada uch yil davomida “Manchester Siti” safida 146 ta rasmiy o‘yinda maydonga tushib, 124 ta gol urgan. Shuningdek, uning hisobida 21 ta golli uzatma ham bor.
Transfermarkt ma’lumotlariga ko‘ra, Holandning transfer qiymati hozirda 180 million yevroga baholanmoqda. Norvegiyalik futbolchi jamoasi bilan yangi Angliya Premer-ligasi mavsumini 16-avgust kuni “Vulverxempton”ga qarshi o‘yin bilan boshlaydi.
