"Real" klubi hujumchisi Vinisius Junior futbol olamidagi asosiy mavzulardan biri bo‘lib qolmoqda. Bu haqida Euro-football.ru xabar berdi.
Transfer News Live manbasining Cadena SER radiostansiyasiga tayanib bergan ma’lumotiga ko‘ra, Vinisius klubning so‘nggi shartnoma uzaytirish taklifini rad etgan. 25 yoshli futbolchining vakillari moliyaviy tomondan bu taklifni yetarli deb hisoblamagan.
Vinisius o‘zining maoshini Kilian Mbappe darajasiga ko‘tarishni talab qilmoqda. Braziliyalik futbolchi yangi mavsumdagi o‘yinlari orqali maoshining oshirilishini oqlashni maqsad qilgan.
Avvalroq matbuotda Vinisius va Mbappening asosiy maoshlari deyarli bir xil ekani, biroq fransiyalik futbolchi klubga erkin agent sifatida kelgani uchun katta bonus olgani bois, umumiy daromadi ko‘proq ekani haqida xabarlar chiqqan edi. "Real" klubi esa Vinisiusni boshqa klubga sotish masalasini ko‘rib chiqishga tayyor.
Klub rahbariyati futbolchi bilan yangi kelishuvga erisha olmasa, uning transferi bo‘yicha takliflarni ko‘rib chiqishi mumkin. Hozircha tomonlar o‘rtasida muzokaralar davom etmoqda.
