Tottenxem futbol klubi bosh murabbiyi Tomas Frank jamoa sardori Son Xyon Minning yaqin orada klubni tark etishi haqidagi savolga javob berdi. Bu haqida Euro-football.ru xabar berdi.
33 yoshli hujumchi ochiq bayonot berib, tez orada klubdan ketishini ma’lum qilgan edi. Tomas Frank ushbu holat yuzasidan quyidagicha fikr bildirdi: “Shaxsan men Son kabi ajoyib inson va futbolchi bilan birga ishlashdan mamnun bo‘lardim.
Son barcha mezonlarga ko‘ra Tottenxemning haqiqiy afsonasi, Angliya Premer-ligasining eng yaxshi futbolchilaridan biri hisoblanadi. To‘g‘ri vaqtni topib, jamoani tark etish har doim ham oson emas”, dedi Tottenxem bosh murabbiyi.
Eslatib o‘tamiz, Tomas Frank joriy yilning yozida Tottenxemga bosh murabbiy etib tayinlangan. U bu lavozimda iste’foga chiqqan Anje Postekogluni almashtirdi.
Son Xyon Min esa 2015 yildan beri Tottenxem safida harakat qilib kelmoqda. Janubiy koreyalik futbolchining faoliyatini Amerika Qo‘shma Shtatlaridagi MLS ligasida davom ettirishi kutilmoqda.
