Rossiya terma jamoasining sobiq futbolchisi, hozirda futbol bo‘yicha ekspert sifatida faoliyat yuritayotgan Aleksandr Mostovoy “Zenit” klubi yarim himoyachisi Luis Enrikening Saudiya Arabistonining “Al-Nasr” jamoasiga o‘tishi ehtimoli haqida fikr bildirdi. Bu haqida Euro-football.ru xabar berdi.
Mostovoyning so‘zlariga ko‘ra, agar “Zenit” Luis Enrikeni 70 million yevroga sotish taklifini olsa, bu transferni amalga oshirishga arziydi. Unga ko‘ra, futbolchi “Zenit”ga 30 million yevroga kelgan bo‘lsa, uni 70 million yevroga sotish klub uchun foydali bo‘ladi.
Shuningdek, Braziliyada Luis Enrike kabi yana 50 ga yaqin futbolchi bor va ular ham “Zenit”da o‘ynashni istaydi, deb ta’kidladi Mostovoy. Avvalroq matbuotda “Al-Nasr” klubi, unda portugaliyalik futbolchi Krishtianu Ronaldu ham to‘p suradi, “Zenit” futbolchisini xarid qilish uchun 70 million yevro ajratishga tayyor ekani haqida xabarlar tarqalgan edi.
Luis Enrike Sankt-Peterburgning “Zenit” klubiga Braziliyaning “Botafogo” jamoasidan qish faslida ko‘chib o‘tgandi. Uning transferi taxminan 33 million yevroga baholangan.
