Chelestini kelganiga bir oy, natijalar ijobiy bo‘ldi
Rossiya terma jamoasi va Ispaniyaning “Sel’ta” klubi sobiq yarim himoyachisi Aleksandr Mostovoy Moskvaning CSKA jamoasidagi murabbiylar almashinuvi haqida o‘z fikrlari bilan o‘rtoqlashdi. Bu haqida Euro-football.ru xabar berdi.
Aleksandr Mostovoyning aytishicha, bir oy avval CSKA yangi bosh murabbiyi Fabio Chelestini haqida ko‘pchilik deyarli hech narsa bilmas edi. Hozir esa jamoa Superkubokda g‘alaba qozondi va yana bir necha muhim o‘yinlarda zafar quchdi.
Ayrimlar bu natijalar oldingi murabbiy Marko Nikolichning mehnati deb hisoblashlari mumkin. Biroq Mostovoyning fikriga ko‘ra, Nikolich CSKAda bir yil ishlagan va jamoaga o‘z hissasini qo‘shgan bo‘lsa-da, hozirgi yutuqlar Chelestinining ham xizmatidir.
Serbiyalik mutaxassis Marko Nikolich 2024-2025 yilgi mavsumda CSKA jamoasini boshqargan. Uning boshchiligida jamoa Rossiya chempionatida uchinchi o‘rinni egalladi va Fonbet Rossiya Kubogini qo‘lga kiritdi.
Yozda esa Nikolich Gretsiyaning AEK jamoasidan taklif oldi va u yerga yo‘l oldi. Uning o‘rniga esa Shveysariyalik Fabio Chelestini bosh murabbiy etib tayinlandi.
Chelestini avval “Bazel” va “Lyutsern” klublari bilan bir necha sovrinlarni qo‘lga kiritgan tajribali mutaxassis hisoblanadi. Hozirda u CSKA jamoasini yangi bosqichga olib chiqish uchun harakat qilmoqda.
