Sobiq Germaniya terma jamoasi va Myunxenning "Bavariya" klubi darvozaboni bo‘lgan Oliver Kan Bundesligadagi hozirgi vaziyat haqida o‘z fikrlarini bildirdi. Bu haqida Euro-football.ru xabar berdi.
Oliver Kan o‘z intervyusida Bundesligada avvallari raqobat ancha kuchli bo‘lganini ta’kidladi. Uning so‘zlariga ko‘ra, ilgari chempionlik uchun ko‘proq jamoalar kurashgan va musobaqa ochiqroq bo‘lgan.
Hozir esa, Bundesligani "eng halol" musobaqa deb atash qiyin. Kan jamoalarning moliyaviy imkoniyatlari o‘rtasidagi katta tafovutga e’tibor qaratdi.
U, bir jamoaning byudjeti 30 yoki 40 million yevro bo‘lsa, boshqa bir jamoa byudjeti 300 million yevroga yetishini adolatli deb bo‘lmasligini aytdi. Bu holat chempionatda raqobatni susaytiradi va natijalarga ham ta’sir ko‘rsatadi.
Oliver Kan bu tafovut yil sayin ortib borayotganini ham ta’kidladi. Uning fikricha, Klub jahon chempionati kabi yirik turnirlar orqali kuchli jamoalar qo‘shimcha daromad oladi va bu farq yanada chuqurlashadi.
Shu sababli, Bundesligada muvozanatni tiklash uchun moliyaviy tenglikni ta’minlash lozimligini qayd etdi.
