Luis Dias Bavariyada ilk mavsumidan nimalar kutmoqda
Bavariya klubi futbolchisi Luis Dias Germaniyaga ko‘chib o‘tganidan so‘ng ilk mavsumida nimalarga erishmoqchi ekanini aytib o‘tdi. Bu haqida Euro-football.ru xabar berdi.
Kolumbiyalik futbolchi shanba kuni Myunxen jamoasi safida birinchi bor maydonga tushdi va jamoaga Fransiyaning Lion klubiga qarshi o‘rtoqlik uchrashuvida g‘alaba qozonishda yordam berdi. O‘yin 2:1 hisobida yakunlandi.
Luis Dias o‘z intervyusida shunday dedi: “Bavariyaga kelgan kunimdan boshlab barcha sovrinlarni yutishni maqsad qilganman. Jamoaga foydali bo‘lish, ko‘proq gollar urish, samarali uzatmalar berish niyatim bor.
Ba’zan zaxirada o‘tirishga to‘g‘ri kelgan taqdirda ham, har doim murabbiy ixtiyorida bo‘lishga va maydonda bor kuchimni berishga harakat qilaman. Umid qilamanki, oldimizda muvaffaqiyatli mavsum kutmoqda.” Ma’lumot uchun, Luis Dias Bavariyaga iyul oyining oxirida Angliyaning Liverpul klubidan o‘tgan va Germaniya klubi unga 70 million yevro to‘lagan.
Diasning asosiy maqsadi — yangi jamoasida yuqori natijalarga erishish va klubga ko‘proq foyda keltirishdir.
