Barselona futbol klubi sport direktori Deku seshanba kuni darvozabon Mark-Andre ter Shtegen bilan muhim uchrashuv o‘tkazadi. Bu haqida Euro-football.ru xabar berdi.
Germaniyalik futbolchi yaqinda orqa qismidagi muammolar sababli operatsiya qilindi. Uning to‘liq sog‘ayib ketishi uchun to‘rt oy yoki undan ko‘proq vaqt talab etilishi mumkin.
Barselona klubi La Liga rasmiylariga ter Shtegenning uzoq muddat maydonga tusha olmasligi haqida tibbiy xulosa yuborishni rejalashtirmoqda. Agar bu xulosa tasdiqlansa, klub ter Shtegen maoshining bir qismini boshqa futbolchi, ya’ni Joan Garsiyani ro‘yxatdan o‘tkazish uchun ishlatishi mumkin bo‘ladi.
Biroq, bunday tibbiy xulosani yuborish uchun ter Shtegenning o‘zi bilan kelishuvga erishish talab etiladi. Avvalroq futbolchi omma oldida uch oy ichida sog‘ayishiga umid qilayotganini bildirgan edi.
Bu esa Barselona rejasiga muayyan qiyinchiliklar tug‘dirgan. Agar ter Shtegen jarohati rasmiy ravishda uzoq muddatli deb topilmasa, klub uchun Joan Garsiyani ro‘yxatdan o‘tkazish murakkab bo‘ladi.
Yaqinlashib kelayotgan uchrashuvda aynan shu masalani hal qilish ko‘zda tutilgan. Bundan tashqari, Barselona klubi ter Shtegen bilan munosabatlarni yaxshilashni istamoqda.
Klub unga yanvar oyida yangi jamoa topishda yordam berishga tayyorligini bildiradi, shuningdek, agar Mark-Andre klubda qolishni istasa, shartnomasini to‘liq bajarishga ham tayyorligini ma’lum qiladi. Avvalroq Barselonaning bosh murabbiyi Hans-Diter Flik ter Shtegen bilan suhbatlashgan va unga yangi mavsumda asosiy darvozabon bo‘lib o‘ynamasligini bildirgan.
