Angliyaning “Manchester Yunayted” futbol klubi bosh murabbiyi Ruben Amorim jamoada uzoq muddat ishlash orzusi borligini ma’lum qildi. Bu haqida Euro-football.ru xabar berdi.
Uning so‘zlariga ko‘ra, u klubda 20 yilga yaqin faoliyat yuritishni istaydi va bu uning asosiy maqsadi hisoblanadi. Amorim natijalarning muhim ahamiyatga ega ekanini yaxshi tushunishini ta’kidladi.
O‘tgan mavsumda ishonchni oqlash uchun imkoniyatlar tugaganini, biroq endi hammasini yangi bosqichdan boshlashga tayyor ekanini bildirdi. U ilgari “Sporting” klubida ham shunga o‘xshash vaziyatga duch kelganini, avvaliga ko‘pchilik uch oy ichida ishdan ketadi deb o‘ylaganini aytdi.
Murabbiy klubni tez-tez o‘zgartirishni yoqtirmasligini, insonlar bilan mustahkam aloqalar o‘rnatishni va shu yerda uzoq vaqt qolishni istashini qayd etdi. O‘tgan mavsumda “Manchester Yunayted” Angliya Premer-ligasida 15-o‘rinni egalladi hamda Yevropa Ligasi finalida “Tottenxem”ga mag‘lub bo‘ldi.
Amorim kelgusida jamoaning natijalarini yaxshilash uchun astoydil harakat qilishini va sodiqlik bilan ishlashga tayyor ekanini bildirdi.
