Tottenxem Palinyuni sotib olish narxi ma'lum bo‘ldi
Tottenxem futbol klubi Germaniyaning Bavariya jamoasidan yarim himoyachi Joau Palinyuni ijaraga oldi. Bu haqida Euro-football.ru xabar berdi.
Klub rasmiy bayonotida futbolchi keyinchalik to‘liq sotib olinishi mumkinligi ta'kidlandi. Mashhur jurnalist Ben Jeykobs ma'lumotiga ko‘ra, Tottenxem klubi portugaliyalik futbolchini butunlay sotib olish uchun 25 million yevro to‘laydi va qo‘shimcha tarzda yana 5 million yevro bonus sifatida ajratadi.
Bu bitim Bavariya klubi bilan kelishilgan. 2024 yil yozida Bavariya Joau Palinyuni Angliyaning Fulhem klubidan 51 million yevro evaziga sotib olgan edi.
Biroq, futbolchi Germaniyada o‘tkazgan yagona mavsumida asosiy tarkibdan o‘rin ololmagan va o‘zini to‘liq namoyon eta olmagan. Shu sababli, yangi imkoniyat izlab, Angliyaning Tottenxem jamoasiga o‘tishga qaror qilgan.
Joau Palinyu 30 yoshda. U jurnalistlarga bergan intervyusida Tottenxemga o‘tish qarorida klub bosh murabbiyi Tomas Frankning taklif va ishonchi muhim rol o‘ynaganini aytdi.
Tottenxem ushbu transfer orqali yarim himoya chizig‘ini mustahkamlashni rejalashtirmoqda. Klub rahbariyati va mutaxassislar futbolchidan yuqori natijalar kutmoqda.
