Rossiya terma jamoasi UEFA va FIFA tomonidan joriy etilgan sanksiyalar tufayli faqat o‘rtoqlik uchrashuvlari o‘tkazishda davom etmoqda. Bu haqida Euro-football.ru xabar berdi.
Joriy yil sentabr oyida Valeriy Karpin boshchiligidagi Rossiya terma jamoasi Iordaniya terma jamoasiga qarshi maydonga tushadi. Ushbu uchrashuv Rossiya uchun uy maydonida bo‘lib o‘tadi.
Iordaniya terma jamoasining ijtimoiy tarmoqlardagi sahifasida ushbu o‘yin haqida ma’lumot e’lon qilindi. Unga ko‘ra, Rossiya va Iordaniya terma jamoalari o‘rtasidagi o‘yin payshanba kuni, 4-sentabr sanasiga belgilangan.
Ma’lumot uchun, shu yil yoz boshida Iordaniya terma jamoasi ilk bor Jahon chempionati – 2026 musobaqasiga yo‘llanmani qo‘lga kiritdi. Bu jamoa tarixida birinchi marta Jahon chempionatida ishtirok etadi.
Eslatib o‘tamiz, iyun oyida Rossiya terma jamoasi Nigeriya bilan durang o‘ynagan (1:1) va Belarus ustidan zafar quchgan (4:1). Shu tarzda, Rossiya terma jamoasi xalqaro maydonda faoliyatini o‘rtoqlik o‘yinlari orqali davom ettirmoqda.
