“Inter” futbol klubi Ademole Lukman transferi yuzasidan “Atalanta” bilan kelishuvga erisha olmasa, boshqa futbolchilarni sotib olishni rejalashtirmoqda. Bu haqida Euro-football.ru xabar berdi.
Hozirda “Atalanta” klubi 27 yoshli hujumchini Milanga qo‘yib yuborishga shoshilmayapti, garchi futbolchining o‘zi jamoani tark etishni istayotgan bo‘lsa ham. Tahlillarga ko‘ra, agar Lukman transferi amalga oshmaydigan bo‘lsa, “Inter” rahbariyati bir nechta variantlarni ko‘rib chiqmoqda.
Ular orasida “Chelsi” jamoasi futbolchisi Kristofer Nkunku, shuningdek, “Manchester Yunayted”dan Alejandro Garnacho va Jeydon Sancho bor. Bundan tashqari, Germaniyaning “RB Leyptsig” klubida to‘p surayotgan Antonio Nusa ham “Inter” diqqat markaziga tushgan.
Yaqinda “Inter” Lukman uchun 45 million yevro va qo‘shimcha bonuslar taklif qilishi haqida xabarlar tarqaldi. Biroq “Atalanta” o‘z futbolchisi uchun 50 million yevro so‘ramoqda.
Hozircha muzokaralar davom etmoqda va “Inter” qaysi futbolchi bilan kelishuvga erishishi yaqin kunlarda ma’lum bo‘ladi.
