"Liverpul" futbol klubi yarim himoyachisi Xarvi Elliot Germaniyaning "RB Leyptsig" jamoasiga o‘tishi mumkin. Bu haqida Euro-football.ru xabar berdi.
Dastlabki ma’lumotlarga ko‘ra, nemis klubi ingliz futbolchisiga qiziqish bildirgan. Mashhur futbol jurnalisti Fabrizio Romano xabariga ko‘ra, "RB Leyptsig" vakillari bu transferga jiddiy yondashmoqda va 22 yoshli futbolchi uchun saxiy taklif tayyorlashga tayyor.
"RB Leyptsig" allaqachon Xarvi Elliotning agentlari bilan uchrashuv o‘tkazdi. Suhbat davomida nemis klubi o‘zining sport loyihasi va hamkorlik shartlari haqida batafsil ma’lumot berdi.
"Liverpul" esa futbolchini sotish uchun kamida 45 million yevro talab qilmoqda. Shuningdek, ushbu futbolchiga Angliyaning boshqa klublari ham qiziqish bildirgan.
Jumladan, "Vest Hem", "Nyukasl" va "Brayton" jamoalari ham Elliotni o‘z safiga qo‘shishga harakat qilmoqda. Biroq, hozircha transfer bo‘yicha yakuniy qaror qabul qilinmagan.
Muzokaralar davom etmoqda va futbolchining kelajagi yaqin kunlarda aniqlik kasb etishi kutilmoqda.
