Aston Villa klubi Parij Sen-Jermen jamoasining hujumkor yarim himoyachisi Marko Asensioni yana ijaraga olishga qiziqish bildirmoqda. Bu haqida Euro-football.ru xabar berdi.
Ispaniyalik futbolchi avvalroq Turkiyaning Fenerbahche klubiga o‘tishga yaqin edi, biroq moliyaviy muammolar sababli muzokaralar vaqtincha to‘xtatildi. Endilikda, L'Equipe nashri xabariga ko‘ra, Aston Villa klubi 29 yoshli futbolchini yana bir mavsumga ijaraga olish uchun kurashga qo‘shildi.
Marko Asensio o‘tgan mavsumning ikkinchi yarmida Aston Villa jamoasi safida to‘p surgan edi. U birinchi bor Birmingem klubida 21 ta o‘yinda maydonga tushib, 8 ta gol urgan va 1 ta golli uzatmani amalga oshirgan.
Unai Emeri boshchiligidagi jamoada uning o‘yini ijobiy baholangan. Transfermarkt mutaxassislari esa sobiq Real Madrid futbolchisining narxini 20 million yevro atrofida baholamoqda.
Shu tariqa, Marko Asensioning kelajagi hozircha ochiq qolmoqda. Yangi mavsumda u qaysi jamoada o‘ynashi hali noma’lum, biroq Aston Villa uning xizmatlariga jiddiy qiziqish bildirmoqda.
