Estevao Chelsini tanlash sababini ochiq aytdi

«Chelsi» jamoasining yangi futbolchisi Estevao Villian nima uchun aynan London klubini tanlaganini tushuntirib berdi. Bu haqida Euro-football.ru xabar berdi.

U ilgari Braziliyaning «Palmeyras» jamoasida o‘ynagan va o‘sha paytda ko‘plab yirik Yevropa klublari uni o‘z safiga qo‘shishni istagan edi. Shunga qaramay, Estevao «Chelsi»ni tanlashga qaror qildi.

Jamoa matbuot xizmati xabariga ko‘ra, 18 yoshli futbolchi uchun klubning tuzilmasi, loyihalari va kelajak rejalari eng muhim omillar bo‘lgan. Estevaoning aytishicha, u va oilasi aynan shu jihatlarga e’tibor bergan va barcha imkoniyatlarni ko‘rib chiqib, eng to‘g‘ri qarorni qabul qilgan.

Estevao Villian 2024 yilda «Chelsi» bilan shartnoma imzolagan. Shu vaqtdan buyon u Braziliya chempionatida o‘zini ko‘rsatib, mamlakat terma jamoasi tarkibida ham besh uchrashuvda qatnashgan.

Yosh futbolchi «Chelsi» safida o‘z oldiga yuqori maqsadlar qo‘yganini ta’kidlab, klub rahbariyati va murabbiylar jamoasiga ishonch bildirgan. Klub esa uni kelajak uchun muhim futbolchi sifatida ko‘radi.

London jamoasi Estevaoning rivojlanishi uchun barcha sharoitlarni yaratishga tayyor.