Rossiya terma jamoasining sobiq futbolchisi Vladislav Radimov Oliy liga jamoalarida murabbiylar almashinuvi yuzasidan o‘z fikrini bildirdi. Bu haqida Euro-football.ru xabar berdi.
Radimovning aytishicha, tez orada “Sochi” jamoasi bosh murabbiyi Robert Moreno lavozimini tark etishi mumkin. Uning fikriga ko‘ra, agar “Sochi” tarkibiga yangi va kuchli futbolchilar kelmasa, hozirgi holatda Moreno jamoani yaxshi natijalarga olib chiqa olmaydi.
“Sochi” jamoasi bu yil bahorda pley-off o‘yinlarida g‘alaba qozonib, yana Oliy ligaga qaytdi. Ammo chempionatning dastlabki uchta turida Robert Moreno shogirdlari ketma-ket uchta mag‘lubiyatga uchradi va umumiy hisobda atigi bir gol urishga muvaffaq bo‘ldi, raqiblar esa ularning darvozasiga to‘qqizta gol kiritdi.
“Sochi” Oliy ligadagi navbatdagi uchrashuvini yakshanba kuni, 10 avgustda poytaxtning “Dinamo” jamoasiga qarshi o‘tkazadi. Ta’kidlash joizki, joriy mavsumda Oliy ligada ilk murabbiy ishdan bo‘shatilishi allaqachon sodir bo‘ldi.
Seshanba kuni “Axmat” jamoasi o‘z murabbiyi Aleksandr Storozhuk bilan shartnomasini bekor qildi.
