Son Xyon Min “Los-Anjeles”ga o‘tishini sharhladi

Janubiy Koreya terma jamoasi hujumchisi Son Xyon Min endilikda “Los-Anjeles” futbol klubi a’zosi bo‘ldi. Bu haqida Euro-football.ru xabar berdi.

U bungacha Angliyaning “Tottenxem” jamoasida o‘ynagan. Son Xyon Min o‘zining yangi jamoaga o‘tishini sharhlab, “Los-Anjeles” kabi dunyoning mashhur sport shahri va katta maqsadlarni ko‘zlagan klubga qo‘shilganidan faxrlanishini ta’kidladi.

U klubning yangi tarixini yaratishda o‘z hissasini qo‘shishga tayyor ekanini bildirdi. Shuningdek, yangi sinovlarni intiqlik bilan kutayotganini, Los-Anjelesga kelishdan maqsadi jamoa uchun sovrinlar yutish va klub, shahar hamda uning muxlislari uchun bor kuchini sarflashini aytdi.

Eslatib o‘tamiz, Son Xyon Min so‘nggi o‘n yil davomida “Tottenxem” tarkibida harakat qilib, klubning muhim futbolchilaridan biri bo‘ldi. O‘tgan mavsumda u “Tottenxem” bilan UEFA Yevropa Ligasi Kubogini qo‘lga kiritgan.

Hozirda “Los-Anjeles” futbol klubi AQSHning MLS chempionatida G‘arbiy konferensiyada ishtirok etmoqda va jamoa hozirgi paytda oltinchi o‘rinni egallab turibdi.