«Chelsi» futbol klubining yangi futbolchisi Estevao Villian so‘nggi intervyusida jamoadoshi Koul Palmerning so‘zlarini tushunmaganini aytib o‘tdi. Bu haqida Euro-football.ru xabar berdi.
Uning so‘zlariga ko‘ra, yaqinda o‘tgan o‘yinda Palmer, Essugu va Delap unga murojaat qilgan. Estevao esa Palmer aytgan gaplarning birontasini ham tushunmaganini, faqatgina uning kayfiyati yuqoriligini sezganini ta’kidladi.
Bir oycha avval, 18 yoshli braziliyalik futbolchi «Palmeyras» tarkibida Klublar o‘rtasidagi jahon chempionati chorak finalida «Chelsi»ga qarshi maydonga tushgan edi. O‘sha uchrashuvda Estevao bo‘lajak jamoasining darvozasiga gol urgan, biroq bu natija jamoasiga g‘alaba keltirmagan.
Uchrashuv «Chelsi» foydasiga 2:1 hisobida yakunlangan. O‘yindan so‘ng Palmer matbuotga Estevao bilan suhbatlashganini, ammo braziliyalik futbolchi uning gaplarini tushunmaganini ma’lum qilgan edi.
Estevao bu holatni o‘zi ham tasdiqladi va Palmerning faqat quvonchli kayfiyatini sezganini bildirdi. Eslatib o‘tamiz, Enso Mareska boshchiligidagi «Chelsi» jamoasi Klublar o‘rtasidagi jahon chempionatida g‘oliblikni qo‘lga kiritgan.
