Son Xyon Min "Tottenxem" muxlislariga vidolashuv murojaati yo‘lladi
Son Xyon Min rasman "Los-Anjeles" futbol klubi futbolchisiga aylandi. Bu haqida Euro-football.ru xabar berdi.
"Tottenxem" klubi ijtimoiy tarmoqlarida futbolchining muxlislarga yo‘llagan vidolashuv videosi eʼlon qilindi. Unda Son Xyon Min o‘zining "Tottenxem"dagi faoliyati davomida muxlislar bilan birga o‘tgan qadrli damlari haqida gapirib o‘tdi.
U o‘z murojaatida: "Hurmatli muxlislar, har safar g‘alabani nishonlaganimizda, sizlar bilan bog‘liq xotiralarni yaratdim. Bu bizning birgalikdagi daqiqalarimiz edi.
Men sizlarni hech qachon unutmaslik uchun har lahzani asrab keldim. Sizlar meni Shimoliy Londonda o‘z bag‘ringizga oldingiz, o‘sishimga guvoh bo‘ldingiz.
Eng quvonchli lahzalarimda – Oltin butsa, eng yaxshi gol uchun mukofotni olganimda – yonimda bo‘ldingiz. Og‘ir paytlarimda ham meni qo‘llab-quvvatladingiz.
Men har doim sizlar bilan birga bo‘ldim. Jamoa sardori bo‘lishimni hech o‘ylamagan edim, lekin sizlar uchun nimanidir yutishni orzu qilardim.
Biz Yevropa Ligasi Kubogini qo‘lga kiritdik va bu sizlarning mehnatingiz natijasi. O‘tgan yillar uchun minnatdorchilik bildiraman, har bir suratni asrayman.
Sizlar har doim yodimda bo‘lasizlar. Katta rahmat", deb taʼkidladi Son Xyon Min.
Eslatib o‘tamiz, Son Xyon Min so‘nggi o‘n yil davomida "Tottenxem" safida to‘p surdi. Shu davr mobaynida klub faqat bitta sovrinni, yaʼni UEFA Yevropa Ligasi Kubogini qo‘lga kiritdi.
Endilikda Son Xyon Min "Los-Anjeles" klubi sharafini himoya qiladi.
