Bavariya o‘yinni kech boshlagani uchun jarimaga tortildi
Germaniyada tartib-intizom yuqori darajada ekanligi ko‘p bora qayd etilgan. Bu haqida Euro-football.ru xabar berdi.
Yaqinda bu holat yana bir bor tasdiqlandi. Myunxenning mashhur “Bavariya” futbol klubi 35 ming yevro miqdorida jarimaga tortildi.
Sababi, jamoa o‘tgan mavsumda “Maynts”ga qarshi o‘yinda uchrashuv boshlanishini 37 soniyaga kechiktirdi. Ushbu holat Germaniya chempionatining 31-turida sodir bo‘lgan.
Jarima avvalroq belgilangan bo‘lsa-da, “Bavariya” uni rad etishga harakat qildi, biroq klubning shikoyati qanoatlantirilmadi va jarima kuchda qoldi. Qizig‘i shundaki, o‘sha o‘yinda “Bavariya” 3:0 hisobida g‘alaba qozondi va mavsum yakunida Germaniya chempioni bo‘ldi.
Yangi futbol mavsumi esa 22-avgust kuni boshlanadi. Dastlabki turda “Bavariya” o‘z maydonida “Leyptsig” jamoasiga qarshi bahs olib boradi.
Bu voqea yana bir bor Germaniyada intizom va qoidalarga qat’iy rioya qilinishini ko‘rsatadi. Shu kabi tartiblar futbol musobaqalarida ham muhim ahamiyatga ega.
