Pavlyuchenko: Til bilmaslik Angliyada qiynalishimga sabab bo‘ldi
Londonning “Tottenxem” jamoasida o‘ynagan sobiq hujumchi Roman Pavlyuchenko Angliyada dastlabki bir necha yil yashash unga nega oson bo‘lmaganini tushuntirdi. Bu haqida Euro-football.ru xabar berdi.
Roman Pavlyuchenko o‘z intervyusida dastlabki ikki yil davomida chet elda yashash unga ancha qiyin bo‘lganini aytib o‘tdi. Uning so‘zlariga ko‘ra, asosiy muammo til bilmaslik bo‘lgan.
U ingliz tilini bilmagani sababli kundalik hayotda ham, jamoadoshlar bilan munosabatda ham qiyinchiliklarga duch kelganini ta’kidladi. Shuningdek, u doim vataniga qaytishni xohlab yashaganini ham eslatib o‘tdi.
Eslatib o‘tamiz, Roman Pavlyuchenko Rossiya terma jamoasining sobiq hujumchisi hisoblanadi. U “Tottenxem” klubi tarkibida 2008 yildan 2012 yilgacha to‘p surgan.
Bu davrda u jami 113 uchrashuvda maydonga tushib, 42 ta gol urgan va 10 ta golli uzatma amalga oshirgan. Roman Pavlyuchenko futbolchilik faoliyatini 2022 yilda yakunlagan.
Uning so‘nggi klubi Noginsk shahrining “Znamya Truda” jamoasi bo‘lgan.
