Mashhur portugaliyalik hujumchi Rikardu Kuarejma o‘zining faoliyati boshida to‘p surgan “Barselona” klubida ko‘nikib keta olmagani haqida so‘zlab berdi. Bu haqida Euro-football.ru xabar berdi.
Uning aytishicha, unga yetarlicha o‘yin amaliyoti berilmagan. Kuarejma o‘z intervyusida “Barselona”da faqatgina klub a’zosi sifatida yurishni emas, balki doimiy o‘yinchi bo‘lib maydonga tushishni istaganini ta’kidladi.
O‘sha paytda jamoada Xavi, Puyol, Luis Enrike, Ronaldino kabi mashhur futbolchilar bo‘lgan. Kuarejma bu davrni ertakdek ajoyib vaqt deb eslaydi.
U o‘z navbatini kutishi mumkin edi, biroq o‘sha vaqtda o‘zini asosiy tarkibda o‘ynashga tayyor deb hisoblagan. Shuning uchun murabbiylar unga imkoniyat berishi kerak deb o‘ylagan.
Oradan yillar o‘tib, u o‘z xatosini anglaganini va aslida o‘sha paytda hali to‘liq tayyor bo‘lmaganini tushunganini aytdi. So‘nggi kunlarda esa Kuarejmaning Rossiya klublaridan biriga o‘tishi mumkinligi haqida mish-mishlar tarqaldi.
