Barselona Ferran Torresni sotmaydi, takliflar rad etildi
"Barselona" hujumchisi Ferran Torres faoliyatini Angliya Premyer-ligasida davom ettirishi mumkin edi. Bu haqida Euro-football.ru xabar berdi.
25 yoshli futbolchini "Tottenhem" hamda "Nyukasl" jamoalari o‘z tarkibiga qo‘shib olishga qiziqish bildirgan. Ular ispan futbolchisi uchun 50 million yevro to‘lashga tayyor ekanliklarini ma’lum qilishgan.
Biroq "Barselona" rahbariyati bu takliflarni rad etdi va futbolchi sotilmasligini aniq bildirib o‘tdi. Transfermarkt internet saytida Ferran Torresning narxi 40 million yevroga baholangan.
Uning "Barselona" bilan tuzgan shartnomasi 2027 yilning o‘rtalariga qadar amal qiladi. O‘tgan mavsumda Torres asosan qanot hujumchisi sifatida maydonga tushdi, biroq ko‘plab uchrashuvlarda markaziy hujumchi sifatida ham harakat qildi.
U 45 ta o‘yinda ishtirok etib, 19 ta gol urishga va yettita samarali pas berishga muvaffaq bo‘ldi. Jamoani esa Hans-Diter Flik boshqargan.
Shu tariqa, "Barselona" Ferran Torresni o‘z tarkibida saqlab qolishga qaror qildi va futbolchi bilan amaldagi shartnomani davom ettirish niyatida ekanini ko‘rsatdi.
